Nou op die lug

Monitor

06:00-08:00

Interaktief

Potgooi Soek

SOEK

Datums
calendar calendar
Gevorderde Soek ▾ SOEK HERSTEL
  • AS ONS TWEE EERS GETROUD is deur Gerhard J. Beukes
    AS ONS TWEE EERS GETROUD is deur Gerhard J. Beukes
    Donderdag 2 April 2020

    Frans en Malie van der Merwe is op die vooraand van hulle silwer huweliksherdenking, maar besef dan dat hulle nie ‘n huweliksertifikaat het nie. Is hulle werklik getroud of leef hulle al die jare in “sonde” saam? Die klein Kallie het boonop sy “dieretuin” - bestaande uit ‘n koggelmander, muis, spinnekop, padda en slang - in die voorkamer laat ontsnap. Wat is Oupa besig om uit sy broek te skud? En wat kruip oor die kussing? Midde hierdie konsternasie probeer Malie en haar twee dogters, Santjie en Annelise, om van Oupa ontslae te raak. Sal die weduwee, mevrou Bloom, die stuitige oupa uit hulle pad én sake kry? Trix Pienaar en Johan van Jaarsveld vertolk die hoofrolle in hierdie lekkerlag-klug. Die ander spelers sluit in ‘n jong Jan Ellis as Kallie, en wyle Kitty Albertyn as mevrou Bloom.

  • MIKE EN MAVIS deur Wessel Pretorius
    MIKE EN MAVIS deur Wessel Pretorius
    Donderdag 26 Maart 2020

    Mavis Kellerman is ‘n weduwee wat haarself afgesluit het van die wêreld. Sy e-pos slegs haar dogter en gaan nog kerk toe. Dan word sy na die opening van ‘n nuwe bioskoop wat spesialiseer in klassieke rolprente, genooi. Die eienaar, Mike Lewis, is ‘n eksentrieke oujongkêrel met ‘n ewige romantiese siel. Mavis besef gou dat Mike daarop uit is om haar hart te steel en bevind haarself aan die ontvangkant van ‘n vryery in haar herfsjare. Hierdie is ‘n gewilde argiefdrama, wat in Afrikaans én Engels aangebied word. Die akteurspaar Elize Cawood en Wilson Dunster speel die hoofrolle.

  • FAAN SE TREIN deur Pieter Fourie
    FAAN SE TREIN deur Pieter Fourie
    Donderdag 26 Desember 2019

    Faan woon saam met sy pa en hulle huishoudster, Truia, in ‘n klein Karoodorpie waar hy heeltemal begogel word deur treine. Faan word erg deur die skoolseuns gespot en soms raak hy self die spoor effe byster. Sy pa en die dominee dreig hom. As hy hom nie gedra nie, sal hy weggestuur word… Dis ‘n aangrypende drama wat aan die rolprent, Forrest Gump, herinner.

  • DIE ENGELTJIE WAT AGTERBEBLY HET deur Piet Cillié
    DIE ENGELTJIE WAT AGTERBEBLY HET deur Piet Cillié
    Woensdag 25 Desember 2019

    Trinkie en Sussie hou saam met hulle ouers somervakansie by Willie se Baai. Op die vooraand van Kersfees neul hulle oudergewoonte vir ‘n Kersverhaal, want Pappie se stories is, anders as dié wat mens in boeke kry, altyd amper die waarheid... Gou sit hulle vasgenael deur die storie van die engeltjie wat aarde toe gekom het om saam met die engelekoor te sing by die geboorte van die Jesuskind, en toe, ewe stout, agtergebly het, om vir twee duisend en ‘n bietjie jare die aardbol te omswerf!

  • DIE KRISMISBOKKIE deur Audrey Blignaut
    DIE KRISMISBOKKIE deur Audrey Blignaut
    Woensdag 25 Desember 2019

    Die verhaal speel af in Bredasdorp gedurende die vyftigerjare. Christopher is ‘n hipersensitiewe natuurkind wat moeilik aanpas op die dorp. Hy dreig telkens om weg te loop plaas toe, tot sy pa eendag by die huis aankom met ‘n geskenk vir hom – ‘n klein blou duikertjie, wat Christopher se lewe handomkeer verander, tot groot verligting van die res van die gesin. Maar die lewe gee en die lewe neem.... En Kersfees draai heel anders uit as wat enigeen kon voorspel het.

  • MAN OP DIE MAAN deur Helena Mellet
    MAN OP DIE MAAN deur Helena Mellet
    Donderdag 19 Desember 2019

    Op ‘n plaas op die Kaapse platteland boer Charl en sy dogter Carli met ‘n klomp beeste. Die ander dogter, Bella, is die eienaar van ‘n galery op Stellenbosch. Sy kom kuier vir ‘n naweek op die familieplaas. Mina, die plaashuis se huishoudster, en Bella deel ‘n geheim oor die “man op die maan” – een wat hulle met niemand deel nie, tot iets gebeur wat almal tot in hulle fondamente skok. Intussen het Carli ‘n ogie op die nuwe veearts op die dorp, en gaan kuier dalk té gereeld om “raad te kry” vir haar beestetrop. Hennie se ma dink Charl is ‘n goeie vangs, maar sal hy die beleefdheid beantwoord? Waar is Carli en Bella se ma? En wie is die man op die maan?

  • KULKIEKIES deur Deon Johnston
    KULKIEKIES deur Deon Johnston
    Donderdag 12 Desember 2019

    Hannes is glad nie beïndruk met sy ma se alewige foto’s van hom op haar Facebookbladsy nie. Om die waarheid te sê, hy pes dit! Een aand is daar huismoles by die bure, en Hannes verfilm die hele petalje met sy selfoon en plaas dit op sy eie sosiale media. Waar trek mens die streep met foto’s en video’s van jou kinders (en jou bure) op sosiale media? Wanneer word menseregte aangetas, of jou reg op privaatheid? Dikwels kan onskuldige handelinge lei tot groot tragedies.

  • DIE TJELLO deur Michiel Potgieter
    DIE TJELLO deur Michiel Potgieter
    Donderdag 5 Desember 2019

    ’n Begaafde tjellis verbreek sy kontrak met die Sinfónica de Galicia in Spanje, vlug na sy ouers se plaas en kruip in sy kamer weg. Niks of niemand kan hom uit sy depressie lig nie, maar toe ontdek hy ’n antieke tjello op die solder van sy oupa se huis en vind sy ander helfte.

  • KORPORAAL LEMMER EN DIE ROWERS deur Bun en Heléne Booyens
    KORPORAAL LEMMER EN DIE ROWERS deur Bun en Heléne Booyens
    Donderdag 28 November 2019

    Jy ontvang jou oproepinstruksies om as voyeur saam met die rowers in te val wat aanmeld in die weermagkaserne. ‘n Briljante teks deur die pa en dogter Booyenskombinasie wat jou met deernis, nostalgie en soms afgryse sal vervul. Die sluier op lewe in die sewentiger- en tagtigerjare van nasionale dienspligtiges word gelig op 'n manier wat weergaloos is. Elke karakter wat geskep is vir hierdie verbeelde wereld word voortreflik uitgevoer deur ‘n stewige span akteurs soos Gerard Rudolf, Anrich Herbst, Leon Kruger, De Klerk Oelofse, Wessel Pretorius, André Terblanche, Conradie van Heerden en Jacques Bessinger. Regisseur Johan Rademan neem die vierde muur as’t ware weg met sy styl van regie, en maak jou deel as voyeur in die intieme omgewing van die jong weermagrekrute.

  • DOLLER AS KOPAF deur William Oosthuizen
    DOLLER AS KOPAF deur William Oosthuizen
    Donderdag 21 November 2019

    Freek is verveeld in die tehuis waar hy woon, en besluit om vir hom ‘n “speelding” te bestel, al twyfel sy vriende Dawid en Hardus oor dié waagstuk. Dit maak veral vir die kuise Mara die josie in, en sy en die ander vroue probeer hulle bes om dié stukkie tegnologie te saboteer. Terwyl hulle reken Freek is besig om kêns te word, beraam hy ‘n plan wat Mara heeltemal onkant betrap. ‘n Vrolike, vermaaklike drama propvol kinkels.