Nuus

SOEK

Datums
calendar calendar

18 Desember 2017

RSG saai elke dag tot soveel as 18 nuusbulletins uit. Klik op die betrokke uur hieronder om daardie spesifieke bulletin te lees.
  • Cyril Ramaphosa is die nuwe president van die ANC en ook van Suid-Afrika nadat die 54ste ANC nasionaleverkiesingskongres in Nasrec in Johannesburg hom ná 'n lang stryd verkies het. Hy is aangewys nadat die uitslag vir meer as 'n uur vertraag is omdat van die stemme glo oorgetel moes word. Afgevaardigdes het dié tyd gebruik om te sing en te dans.

  • President Jacob Zuma sê hy voel ontroer deur die geleentheid om president van die land te kon wees, maar hy is bly dat hy nou as ANC-president kan uittree. Zuma het vroeër gesê die enigste verskil tussen die huidige en vorige konferensies is dat daar vanjaar sewe presidentskandidate was. Hy sê dié feit dui op die demokratiese aard van die ANC en die gehalte kandidate in die party.

  • Die rand het tot 12-rand-62 sent teen die dollar verstewig kort nu die aankondiging dat Cyril Ramahosa die ANC se nuwe president is. Dit is die sterkste vlak wat die rand in bykans drie maande teen die Amerikaanse geldeenheid bereik het. Die plaaslike geldeenheid het die afgelope tyd begin styg te midde van die afwagting van 'n politieke verandering wat tot beter ekonomiese toestande in Suid-Afrika kan lei.

  • Die hoofsweep van die ANC se parlementêre koukus, Jackson Mthembu, sê die nuwe leiers van die party sal bewerings van staatskaping as 'n dringende prioriteit moet takel. Hy het gereageer op uitlatings deur president Jacob Zuma dat die koukus faksiegedrewe is in sy toesigrol oor ministers en staatsbeheerde instellings. ANC-lede het verskeie kere skerp kritiek uitgespreek teen ministers wat by bewerings van staatskaping betrek word. Mthembu sê die nuwe leiers moet dringend toesien dat 'n kommissie van ondersoek aangestel word. Intussen is dit nog nie duidelik wanneer die uitslae van die ANC-leiersverkiesing bekend sal wees nie.

  • Drie mense is buite Belhar op die Kaapse Vlakte dood in 'n botsing tussen 'n minibustaxi en 'n motor. Die Wes-Kaap se verkeersowerheid sê die oorledenes was insittendes van die minibus. Vier kinders tussen 12 en 14 ernstig in die botsing beseer. Die taxi was vermoedelik onderweg na die Oos-Kaap toe die ongeluk gebeur het. Die bestuurder van die motor is in hegtenis geneem vir bestuur onder die invloed van alkohol.

  • 'n Oos-Kaapse man is in hegtenis geneem vir die onwettige handel in dagga-olie. Die 53-jarige man van Port Elizabeth is in 'n huis in Theescombe vasgetrek. Die polisie het beslag gelê op tientalle daggaplante en 120 houertjies dagga-olie. Die polisie sê die huidige wetgewing verbied steeds die handel in dagga of enige daggaprodukte, asook die vervaardiging daarvan. Die man sal eersdaags in die hof verskyn.

  • Die strand by Uvongo aan die suidkus van KwaZulu-Natal is weer oopgestel. Die strandgebied was die afgelope drie dae as voorkomingsmaatreël gesluit weens 'n rioolstorting. Die Ugu munisipaliteit is Saterdag ingelig dat 'n pomp by die rioolaanleg onklaar geraak het en dat riool in die meer inloop. Omgewingskundigdes is ingeroep om die omvang van die besoedeling te bepaal en het intussen bevind dat die E.coli-vlak in die water nié die aanvaarbare vlakke oorskry het nie.

  • Minstens 29 mense is in die Filippynse Eilande dood en sowat 15-duisend vakansiegangers is gestrand nadat die tropiese storm Kai-tak die gebied getref het. Die eiland Biliran is die swaarste getref en 26 mense is hier dood weens grondstortings. Tientalle mense is ook in die storms beseer, terwyl 'n groot aantal ook vermis word. Groot gebiede is sonder water en elektrisiteit en herstelwerk word bemoeilik omdat talle brûe deur die vloedwater meegesleur is. Tienduisende mense is deur die storms dakloos gelaat.

  • Die stadsraad van Rome het eenparig besluit om 'n onreg teen die digter van die antieke tyd, Ovidius, reg te stel. Ovidius is in die jaar agt van die huidige jaartelling deur die destydse keiser Augustus uit die stad verban. Die oorsaak was nooit duidelik nie, maar het vermoedelik te doene gehad met iets wat die digter oor Augustus se kleindogter geskryf het. Die besluit om Ovidius se verbanning op te hef is geneem op die tweeduisendste herdenking van die digter se dood in die jaar sewentien. 'n Paar jaar gelede, in 2008, het Italië ook om verskoning gevra vir die vervolging van die digter Dante wat in ballingskap gegaan het na hy weens sy politieke oortuigings ter dood veroordeel is.