Nuus

SOEK

Datums
calendar calendar

27 Junie 2019

RSG saai elke dag tot soveel as 18 nuusbulletins uit. Klik op die betrokke uur hieronder om daardie spesifieke bulletin te lees.
  • Die Konstitusionele Hof het die Algemene Balieraad se aansoek dat die advokate, Nomgcobo Jiba en haar kollega, Lawrence Mrwebi, van die rol van advokate geskrap word, van die hand gewys omdat die grondwetlike meriete van die saak nie bewys kon word nie. Jiba en Mrwebi is onlangs deur President Cyril Ramaphosa afgedank as advokate by die Nasionale Vervolgingsgesag, ná 'n aanbeveling deur die Mokgoro-kommissie van ondersoek dat hulle hul skuldig gemaak het aan wangedrag tydens hoëprofielsake.

  • Die voormalige bedryfshoof van Bosasa, Angelo Agrizzi het by die Randburgse Landdroshof in Johannesburg om verskoning gevra vir sy rassistiese opmerkings. Sy voormalige kollegas by Bosasa het 'n stemopname van 'n privaatgesprek uitgelek waarin hy die K-woord gebruik. Die stemopname is aan die kommissie van ondersoek na staatskaping voorgelê waarna die Menseregtekommissie 'n saak van crimen injuria teen hom ingedien het. Die Gelykheidshof het 'n skikking tussen die kommissie en Agrizzi bekragtig, dat hy nie meer strafregtelik vervolg word nie, maar om verskoning moet vra, en 'n boete van 200-duisend rand betaal aan 'n organisasie wat hom beywer vir maatskaplike samehorigheid, geregtigheid en versoening.

  • Goeie nuus vir verbruikers is dat die Automobiel Assosiasie verwag dat die petrolprys in Julie met 86 sent per liter kan daal. Die AA sê volgens huidige aanduidings kan die prys van diesel met 68 sent per liter daal en paraffien 58 sent per liter minder kos. Die AA sê laer oliepryse wêreldwyd is een van die redes vir ' n moontlike daling.

  • Minstens drie mense is dood in 'n kettingbotsing tussen 17 voertuie op die N12 tussen Emalahleni en Delmas in Mpumalanga. Een van die slagoffers is 'n tweejarige kind. Aanduidings is dat die botsing tussen tien motors, twee vragmotors, vier afleweringsvoertuie en 'n minibus deur digte mis veroorsaak is.