Nuus

SOEK

Datums
calendar calendar

23 April 2019

RSG saai elke dag tot soveel as 18 nuusbulletins uit. Klik op die betrokke uur hieronder om daardie spesifieke bulletin te lees.
  • Politieke partye wat deelgeneem het aan 'n politieke debat op Platfontein in die Noord-Kaap het almal hul kommer uitgespreek oor die trae ekonomie en werkloosheid. Die EFF, Cope, DA en die ANC het almal beloof dat hulle aan 'n plan werk om werk te skep en die ekonomie te stimuleer. Die ANC sê egter hy het meer as viermiljoen huise aan armes verskaf om armoede te verlig. Die EFF sê hy wil 'n ekonomiese sone oprig om werkgeleenthede te skep en die DA sê hy sal voortgaan om die regering van die Noord-Kaap aanspreeklik te hou vir armoede en werkloosheid in die provinsie.

  • Inwoners van Malvern, suid van Durban, het ingespring om soek-en-reddingspanne te help soek na vier familielede wat in die gure weer vermis geraak het. Die soektog is deur die nag deur verdere swaar reën belemmer. Die KwaZulu-Natalse regering sê minstens 23 mense is in die oorstromings dood.

  • Die Hugenotetonnel op die N1 tussen Kaapstad en Worcester is in albei rigtings vir swaar voertuie gesluit weens sterk wind. Dit volg nadat 'n vragmotor gister naby die tonnel deur sterk wind omgewaai is. Die Wes-Kaapse verkeershoof, Kenny Africa, sê rukwinde van 150 kilometer per uur kom in die gebied voor.

  • Sri Lanka het begin om slagoffers van die naweek se bomontploffings te begrawe. Minstens 310 mense is dood en meer as 500 beseer toe ses bomme Sondag by kerke en hotelle ontplof het. Die regering van Sri Lanka vermoed dat dit die werk van die ekstremistegroep NTJ is. Die verdagtes word almal met die ekstremistegroep verbind. Vlae hang vandag halfstok by staatsgeboue. Nagenoeg 40 mense is tot dusver in verband met die ontploffings in hegtenis geneem.