Nou op die lug

Boekvoorlesingomnibus

22:00-23:00

Empty

Interaktief

Nuus

SOEK

Datums
calendar calendar

23 September 2020

RSG saai elke dag tot soveel as 18 nuusbulletins uit. Klik op die betrokke uur hieronder om daardie spesifieke bulletin te lees.
  • Die landbou-organisasie TLU-SA in Limpopo het skerp gereageer op die minister van Polisie, Bheki Cele se opmerkings oor boere vroeër die week. Cele het 'n vergadering by Newcastle in KwaZulu-Natal bygewoon waar die spanning tussen inwoners hoog loop ná die moorde op 'n egpaar, Glenn en Vida Rafferty, op hul plaas. Die voorsitter van die TLU-SA-Noordstreek, Hein van de Graaf, sê Cele het hom aan haatspraak en opswepery skuldig gemaak toe hy gesê het boere moet nie kla as hulle seerkry nie. Van de Graaf sê Cele moet besef hy is nie 'n super heerser nie, maar slegs 'n amptenaar in diens van belastingbetalers. Hy sê indien President Cyril Ramaphosa simpatie met boere gehad het, sou hy Cele reeds afgedank het.

  • Die nasionale polisiekommissaris, Khehla Sitole, het die polisie gelukgewens met hul optrede teen transitorowers aan die Gautengse Oos-Rand. Vyf vermeende transitorowers is vroeër vandag doodgeskiet en twee is in hegtenis geneem is tydens 'n oor-en-weer skietery met die polisie by 'n huis in Dawnpark. 'n Polisiewoordvoerder, Brenda Muridili, sê die rowers het ná 'n rooftog vanoggend vermoedelik by die huis gaan skuil. Die polisie het op vier vuurwapens en ammunisie en op drie gekaapte voertuie beslag gelê en ook van die geroofde geld teruggekry. Muridili sê die polisie het op 'n wenk gereageer waarna die skietery uitgebreek het.

  • Die saak teen die man wat aangekla word van die moord op die 14-jarige Zintle Segwape, is in die Kabokweni Landdroshof in Mpumalanga tot aanstaande week Woensdag uitgestel. Die 19-jarige Kgaugelo Sibiya is 'n neef van die slagoffer. Hy is Maandag in hegtenis geneem nadat Segwape se liggaam in 'n puttoilet by haar huis in KaMasoyi naby Witrivier gevind is. Sy is verlede week Woensdag laas gesien. Die familie het volgens berigte dreigende boodskappe en 'n eis vir 'n losprys ontvang. Sibiya staan tereg op aanklagte van moord, roof en ontvoering. Hy sal in aanhouding bly tot sy volgende hofverskyning wanneer hy formeel om borgtog sal aansoek doen.

  • Die Nasionale Vervolgingsgesag sê die ondersoek na die dood van die 16-jarige Nathaniel Julies van Eldoradopark, is nog nie afgehandel nie. Uitspraak in die borgtogaansoek van die drie polisiebeamptes wat in verband met Julies se dood aangekla word, is vroeër vandag in die Protea Landdroshof tot Maandag uitgestel. Julies - wat Downsindroom gehad het - is verlede maand naby sy huis doodgeskiet. Die staat het die beskuldigdes se borgtogaansoek teengestaan. 'n Woordvoerder van die NVG, Phindi Mjonondwane sê die onus is op die beskuldigdes om die hof te oortuig dat daar buitengewone omstandighede is om te regverdig dat hulle op borgtog vrygelaat word.

  • 'n Lid van 'n wildstroopsindikaat is in die Randburgse landdroshof tot effektief tien jaar gevangenisstraf gevonnis in verband met die onwettige handel in renosterhoring en seediere. Die Valke sê Yanseng Feng is verlede jaar in hegtenis geneem vir vir die besit van onder meer renosterhoring, seeperdjies, seekomkommers en perlemoen. Hy is ook aan omkopery skuldig bevind omdat hy 'n polisiebeampte honderd duisend rand aangebied het in 'n poging om borgtog te kry.

  • En om mee af te sluit . . . 'n Vrou van Port Elizabeth wil vir haar 'n plek in die rekordboeke loshardloop en terselftertyd geld vir renosterbewaring insamel. Die fikseidsinstrukteur Sharon Jessop gaan vir 62 dae agtereenvolgend 'n halfmarathon in dié Oos-Kaapse stad hardloop om die publiek bewus te maak van die lot van renosters. Jessop glo haar aanslag op die wêreldrekord met 21 kilometer per dag vir twee maande aaneen vir 'n totaal van duisend-300 kilometer sal ander mense inspireer en motiveer om renosterstropery te bekamp.