Nou op die lug

Deurnag (Maandag)

00:00-04:30

Empty

Interaktief

Programme

TERUG

Musiekbonbons

Vorige Programme

Donderdag 16 Januarie 2020
21:10-22:00

Luister na ’n lied van Franz Lachner, ’n Duitse komponis wat geleef het van 1803 tot 1890. Hy het veral die werk van Beethoven en Schubert hoog aangeslaan. Hy was ’n bekende dirigent, maar het sy hand ook aan komposisies soos kamermusiek gewaag.  Hy het van die tekste wat Schubert vir sy lieder gebruik het, ingespan vir sy eie lieder.

Leopold Sokofski was ‘n Engelse komponis en verwerker, van Poolse herkoms. Hy het geleef tussen 1882 en 1977. Hy het ‘n lang verbintenis gehad met die Philadelphia Orkes. Sy verwerkings vir orkes van werke van onder andere J.S. Bach, Beethoven en Brahms het groot byval gevind. Luister na sy weergawe van Bach se KLEINSUITE.

Donderdag 9 Januarie 2020
21:10-22:00

Luister na ’n werk van Ernesto Nazareth. Hy is van Brasilië, en het geleef van 1863 tot 1934. Tydens sy leeftyd was die Argentynse tango baie gewild. Nazareth het ook sy hand aan dié genre gewaag, maar sy werke (hoofsaaklik vir die klavier) is as die Brasiliaanse tango gedoop.

Isabelle Aboulker is ’n Franse komponis, wat in 1938 gebore is. Sy het in 2000 ’n spesiale prys ontvang vir haar werk as komponis van veral operas en werke vir solostem. Die prys is deur die Vereniging vir Komponiste van Dramatiese Werke geskenk. Die werk wat gehoor kan word is ’n arabesque vir fluit en kitaar.

Nog ’n minder bekende komponis wie se werk in die program gehoor kan word, is Peter Heise van Denemarke. Hy het geleef van 1830 tot 1879. Hy sou aanvanklik in die regte gaan studeer het, maar het baie goed met sy musiekstudies gevaar en besluit om eerder op komposisies te fokus. Hy het ook graag volksmusiek gebruik as ondertoon vir sy werke.

Donderdag 2 Januarie 2020
21:10-22:00

Luister na ’n lied van Brahms. Dié Duitse komponis het ‘n groot liefde vir die kunslied gehad en het sowel geestelike as sekulêre liedere gekomponeer. Soms was dit vir solostem met klavierbegeleiding, maar die meeste daarvan is veelstemmig. Clara Schumann was ook ’n baie goeie vriendin van Brahms, en na haar dood het hy ’n versameling liedere gekomponeer ter ere van die goeie vriendin wat hom aangespoor het om meer op die kunslied te fokus.

Pancho Cabral is ’n moderne Argentynse komponis wat dit ten doel het om ou antieke snaarinstrumente in die moderne era weer tot hulle reg te laat kom. In die snit waarna jy sal kan luister, word daar verskeie van die ou instrumente uit Suid-Amerika gebruik, soos die cuatro, ‘n Spaanse snaarinstrument, en die charango wat uit die Andesbergstreek kom.

Donderdag 26 Desember 2019
21:10-22:00

Luister na ’n lied van die Norweegse komponis Edvard Groeg. Hy het heelwat groot orkeswerke nagelaat, en min tyd gehad vir kamermusiek. Sy versameling liedere is egter uitstaande. Die klavierbegeleiding is ook iets besonders, en is later gepubliseer as aparte werke vir soloklavier.

Die skuiftrompet is een van die orkesinstrumente wat nie veel aandag gekry het in solowerke nie. Daar is enkele konserte vir dié instrument gekomponeer, waar 'n musikant sy veelsydigheid en tegniek kan illustreer. Daarom dat ander musici heelwat verwerkings vir die instrument nagelaat het, soos ’n paar arias uit Mozart se DIE TOWERFLUIT.  Die verwerkings is deur die tromboonspeler, Stanley Clark,  versorg.

Donderdag 19 Desember 2019
21:25-22:15

Luister na ’n lied van Tereza Del Riego. Sy het reeds op die ouderdom van 12 haar eerste lied gekomponeer. Daarna het nog sowat 300 liedere gevolg. Sy het geleef van 1876 tot 1968.

Een van J.S. Bach se leerlinge, Johann Krebs, het dikwels van die groot meester se werke voltooi en afgerond. Krebs was ook ‘n goeie komponis in eie reg. Luister na een van sy Preludes vir orrel. Die skrykensemble, Tempo Guisto, doen hulle weergawe van die werk.

Johann Scheibe het geleef van 1708 tot 1776. Dié Deense musiekkenner was eers ’n kritikus, voordat hy later self sy hand aan komposisies gewaag het. Hy het veral op die fluit as soloinstrument gekonsentreer. Ongelukkig het baie van sy werke verlore geraak. ’n Deel van een van sy Concerti Grosso sal gehoor word.

Donderdag 5 Desember 2019
21:20-22:00

Luister na ’n Fantasie, ’n Studie, ’n Mazurka en ’n Aria.

’n Fantasie is ’n werk wat nie deur enige reëls vasgelê word nie. Dit is ook dikwels in vrye vorm. Dit het sy wortels in die idee van improvisasie wat baie verbeelding en vrye interpretasie vereis.

’n Studie is 'n musiekwerk wat dikwels die vaardigheid van ’n kunstenaar ten toon stel. By ’n klavierstudie word flinke vingerwerk vereis. Sommige komponiste het ook na ’n Studie as ’n Etude verwys. Daar is min Studies/Etudes waar diep emosionele interpretasie/vertolking geverg word.

’n Mazurka is ’n Poolse dans wat sy ontstaan in die Mazoniastreek in Pole het. Tydens die 19de eeu was dit ’n gewilde item by baldanse. Dit het byna altyd 'n vinnige tempo, maar daar is gevalle waar ’n stadige pas vereis word.

’n Aria word dikwels geassosieer met ’n opera. In hierdie geval is dit ’n solowerk vir stem met orkesbegeleiding. Die Aria kan ook ’n enkelwerk wees vir solostem met klavier en/of orkesbegeleiding. Die woord is Italiaans vir die Engelse, Air, wat dikwels in Afrikaans vertaal word as Melodie of Wysie. Die korter weergawe van die Aria is ’n Ariëtta.

Donderdag 28 November 2019
21:30-22:20

Luister na ’n verwerking van MARIA uit Leonard Bernstein se WEST SIDE STORY. Die musiekspel is gebaseer op William Shakespeare se drama, ROMEO AND JULIET, wat in 1594 verskyn het. Shakespeare se drama is weer gebaseer op Arthur Brooke se verhaal, THE TRAGICALL HISTORYE OF ROMEUS AND JULIET wat reeds sedert 1562 bestaan. Van die bekendste deuntjies in WEST SIDE STORY is al in verskillende gedaantes opgeneem. Die tjelloweergawes van veral die lied, MARIA, is baie gewild by verwerkers. Benewens die 12 tjelliste van die Berlynse Filharmoniese Orkes se weergawe, is daar ook een vir tjellokwartet, asook solotjello met klavierbegeleiding. In die oorspronklike teks is dit ’n tenooraria.

Nog ’n item in die program is Eric Cook se BOLIVAR. Die Engelse komponis is in 1916 in Engeland gebore, maar het later na Australië verhuis waar hy in 1985 gesterf het. Sy BOLIVAR is spesiaal vir tromboon met klavierbegeleiding gekomponeer. Die werk het ‘n sterk Spaanse karakter.

Virgil Thomson is ’n Amerikaanse komponis wat geleef het van 1896 tot 1989. Sy AT THE BEACH word beskryf as ‘n konsertwals. Hy het probeer om dieselfde atmosfeer te skep wat geheers het tydens die bekende strandfrontkonserte wat eens op ’n tyd gewild was.

Donderdag 21 November 2019
21:20-22:00

Luister na ’n studie vir kitaar van Ferdinand Sor. Hy was op sy dag die bekendste kitaarspeler. Hy het ook ’n groot musiekskat nagelaat - van werk vir beginners tot meer omvattende werke vir sy geliefde instrument. Benewens sy werke vir kitaar, het hy ook enkele operas, balette en strykkwartette nagelaat. Hy is in 1778 in Barcelona gebore, en sterf in Parys in 1839.

Nog ’n werk wat gehoor kan word, is ’n aria van Francesco Cilea, ’n Italiaanse komponis wat geleef het van 1866 tot 1950. Hy is hoofsaaklik bekend vir sy twee operas, L’ARLESIANA en ANDRIANA LECOUVREUR.

Scott Joplin is sinoniem met ragtime. Hy het 44 oorspronklike werke in dié styl gekomponeer, asook ’n ballet en twee operas. Laasgenoemde genres is ook baie sterk gebaseer op hierdie styl. Joplin is in 1976 met ’n Pullitzerprys vereer vir sy bydrae tot musiek. In hierdie program kan jy luister ‘n mars van Joplin.

Donderdag 14 November 2019
21:10-22:00

Luister na ’n habañera van De Sarasate. Dit is ’n Kubaanse dans in stadige tempo. Die Spaanse vertaling is, LA HABANA. Die gebruik van hierdie dansgenre deur Bizet in sy opera, CARMEN, het dit groot status verleen, maar relatief min komponiste in die klassieke musiekarena het hulle hand aan dié volksdans uit Kuba gewaag.

Antonio Salieri was ‘n uitstaande operakomponis. Hy het 37 operas nagelaat. Die overture waarna jy kan luister, is uit RYK VIR ‘N DAG. Lorenzo da Ponta was die librettoskrywer. Hy het vir baie van Salieri se ander verhoogwerke die librettos geskryf. Hierdie opera het nogal erg gespook by Salieri. Hy het telkemale daaraan gewerk voordat die finale produk sy tevredenheid verkry het.

Nog ’n uitstaande werk is Joaquin Rodrigo se FANTASIE VIR ‘N WARE HEER. Dit is seker een van die bekendste werke vir kitaar en orkes. Rodrigo het ’n aantal melodieë van die 17de eeuse komponis, Gaspar Sanz, gebruik en ‘n meer moderne klank geskep. Die “ware heer” verwys na sowel Gaspar Sanz as die kitaarvirtuoos Andres Segovia. Wat hierdie opname merkwaardig maak, is dat die werk vir fluit en orkes aangepas is met James Galway as die verwerker én solis.

Donderdag 7 November 2019
21:10-22:00

Luister na ’n verwerking van ’n deel uit DIE WATERMUSIEKSUITE van Handel deur Hamilton Harty. Hierdie Ierse komponis, dirigent en verwerker het geleef van 1879 tot 1941. Hy het heelwat van Handel se werke verwerk.

Franz Krommer is ’n Tjeggiese komponis wat geleef het van 1759 tot 1831. Hy het as violis en komponis gespesialiseer, en het ‘n groot skat musiekwerke nagelaat, soos die nege simfonië en ongeveer 70 strykkwartette. Hy is ook baie bekend vir sy werke vir blaasinstrumente.